អន្តរជាតិះ – ប្រធានាធិបតីសហរដ្ឋអាមេរិក ដូណាល់ ត្រាំ និងអនុប្រធានាធិបតី ជេឌី វ៉ាន់ សុទ្ធតែទទួលស្គាល់ជាសាធារណៈថា សង្គ្រាមអ៊ីរ៉ង់ បានធ្វើឱ្យគណបក្សសាធារណរដ្ឋ រងបរាជ័យយ៉ាងធ្ងន់ធ្ងរ ក្នុងការបោះឆ្នោតពាក់កណ្តាលអាណត្តិ ប៉ុន្តែប្រមុខសេតវិមាន នឹងនៅតែបន្តប្រតិបត្តិការយោធានេះដដែល ដើម្បីសម្រេចគោលដៅឱ្យបាន។
សូមចុច Subscribe Channel Telegram (KTN)ដើម្បីទទួលបានព័ត៌មានថ្មីៗទាន់ចិត្ត
https://t.me/topnewsktn
– យោងតាម The New York Times កាលពីថ្ងៃពុធ ទី៤ ខែវិច្ឆិកា ឆ្នាំ២០២៦, លោក ជេឌី វ៉ាន់ បានបង្ហោះសារលើបណ្តាញសង្គម ដោយសង្កត់ធ្ងន់ថា៖ «មូលហេតុដែលយើងចាញ់ គឺដោយសារតែសង្គ្រាម» ហើយនៅពេល អ្នកសារព័ត៌មានសួរនាំ អំពីការលើកឡើងនេះ លោក ត្រាំ ក៏យល់ស្របដែរ និងទទួលស្គាល់ថា វាជាការពិត ព្រោះសង្គ្រាមបានធ្វើឱ្យតម្លៃប្រេងសាំងកើនឡើងក្នុងរយៈពេលខ្លី មែន។

– យ៉ាងណា បើតាមការផ្សាយរបស់ The Wall Street Journal ប្រធានាធិបតីអាមេរិក នៅតែប្រកាន់ជំហរថា លោកគ្មានជម្រើសអ្វីផ្សេង ក្រៅតែពីការបើកការវាយប្រហារ ដើម្បីរារាំងអ៊ីរ៉ង់ មិនឱ្យទទួលបានអាវុធនុយក្លេអ៊ែរនោះទេ ដោយលោកអះអាងថា លោកបានធ្វើរឿងដែលត្រឹមត្រូវ ហើយនឹងធ្វើវាជាថ្មី មិនថយក្រោយឡើយ។
– សម្តីរបស់លោកត្រាំ ហាក់ដូចជាចង់ស្តីបន្ទោស ដល់អ្នកបោះឆ្នោត ព្រោះថា លោកបានលើកឡើងដដែលៗជុំវិញបរាជ័យយ៉ាងចាស់ដៃ របស់បក្ស ក្នុងការបោះឆ្នោតនេះ។ ជាក់ស្តែង មុននេះមួយថ្ងៃ លោកអះអាងថា អ្នកបោះឆ្នោត យល់ស្របនឹងគោលនយោបាយរបស់លោក ចំពោះ អ៊ីរ៉ង់ ប៉ុន្តែប្រហែលជាមិនព្រមទទួលយកផលវិបាករយៈពេលខ្លី គឺការចំណាយប្រាក់កាន់តែច្រើនលើប្រេងឥន្ធនៈនោះទេ។

– ក្នុងបទសម្ភាសន៍តាមទូរស័ព្ទជាមួយបណ្តាញព័ត៌មាន Fox News លោក ត្រាំ និយាយថា៖ «ប្រជាពលរដ្ឋយល់ស្រប នឹងអ្វីដែលខ្ញុំកំពុងធ្វើ ចំពោះប្រទេសអ៊ីរ៉ង់ ប៉ុន្តែពួកគេប្រហែលជាមិនព្រមទទួលយកផលវិបាករយៈពេលខ្លី គឺការចំណាយប្រាក់កាន់តែច្រើនលើប្រេងឥន្ធនៈនោះទេ។ ខ្ញុំចង់ប្រាប់អ្នករាល់គ្នាថា នេះគឺជាបញ្ហាក្នុងរយៈពេលខ្លី ប៉ុន្តែមានផលប្រយោជន៍រយៈពេលវែង»។
– ផ្អែកតាមទិន្នន័យចុងក្រោយ ផ្សាយដោយ BBC News និង CNBC, លទ្ធផលឆ្នោតសម្រាប់ព្រឹទ្ធសភា៖ គណបក្សប្រជាធិបតេយ្យ ទទួលបាន ៥៤ អាសនៈ (កើនឡើង ៧ អាសនៈ) ខណៈគណបក្សសាធារណរដ្ឋ ទទួលបាន ៤៤ អាសនៈ (ថយចុះ ៧ អាសនៈ)។
– ចំណែកសភាតំណាងរាស្ត្រ៖ គណបក្សប្រជាធិបតេយ្យ ទទួលបាន ២៣៧ អាសនៈ (កើនឡើង ២៩ អាសនៈ លើស ២១៨ អាសនៈដែលត្រូវការដើម្បីគ្រប់គ្រងសភា) ខណៈគណបក្សសាធារណរដ្ឋ ទទួលបាន ១៣៩ អាសនៈ (ថយចុះ ២៩ អាសនៈ)។
– លទ្ធផលនេះ បញ្ជាក់ថា ប្រជាជនអាមេរិក ពិតជាមិនពេញចិត្តចំពោះសង្គ្រាមអ៊ីរ៉ង់នោះទេ ហើយក៏បង្ហាញពីការបែកបាក់នយោបាយ ដ៏ជ្រាលជ្រៅនៅអាមេរិក ផងដែរ។
– យោងតាមទិន្នន័យពីមន្ទីរបញ្ចកោណ ដែលទទួលបានដោយទីភ្នាក់ងារសារព័ត៌មាន Reuters, គិតត្រឹមថ្ងៃទី២៨ ខែតុលា ទីក្រុងវ៉ាស៊ីនតោន បានចំណាយប្រាក់ជាង ៤៧ពាន់លានដុល្លារ លើសង្គ្រាមនៅអ៊ីរ៉ង់រួចហើយ ពោលគឺខ្ពស់ជាងការប៉ាន់ប្រមាណរបស់ក្រសួងសង្គ្រាម កាលពីខែកក្កដា ដល់ទៅជាង ២៥% ឯណោះ។
– ផលប៉ះពាល់នៃសង្គ្រាម លើតម្លៃថាមពលសកល បានធ្វើឱ្យការគាំទ្រចំពោះបេក្ខជនមកពីគណបក្សសាធារណរដ្ឋធ្លាក់ចុះ ហើយក៏ធ្វើឱ្យអត្រាគាំទ្រចំពោះលោក ត្រាំ ធ្លាក់ចុះផងដែរ៕

