អន្តរជាតិះ – ក្រោយពីការវាយប្រហារពីរុស្ស៊ី ទៅលើអ៊ុយក្រែនកាន់តែខ្លាំង អង្គការណាតូ (NATO) មិនឱបដៃនៅស្ងៀមឡើយ ដោយកាលពីថ្ងៃព្រហស្បតិ៍ ទី២២ ខែតុលា អង្គការនេះនឹងអនុញ្ញាតឱ្យអ៊ុយក្រែនទិញអាវុធ តាមរយៈទីភ្នាក់ងារកណ្តាលសម្រាប់លទ្ធកម្មអាវុធរបស់សម្ព័ន្ធភាពនេះ ដែលមានឈ្មោះថា ទីភ្នាក់ងារគាំទ្រ និងលទ្ធកម្មរបស់ណាតូ (NSPA) ក្រោមភាពជាដៃគូថ្មីមួយ ខណៈការទិញ នឹងចាប់ផ្តើមក្នុងពេលឆាប់ៗ។
– ភាពជាដៃគូនេះនឹងអនុញ្ញាតឱ្យទីក្រុងកៀវអាចទិញអាវុធ គ្រាប់រំសេវ និងសម្ភារៈយោធាផ្សេងៗទៀត តាមរយៈទីភ្នាក់ងារ NSPA។

សូមចុច Subscribe Channel Telegram (KTN)ដើម្បីទទួលបានព័ត៌មានថ្មីៗទាន់ចិត្ត
https://t.me/topnewsktn
– កាសែត Financial Times (FT) បានចុះផ្សាយអំពីភាពជាដៃគូថ្មីនេះ កាលពីថ្ងៃព្រហស្បតិ៍ ទី២២ ខែតុលា ថា ការសម្រេចចិត្តនេះនឹងជួយឱ្យទីក្រុងកៀវទទួលបានសម្ភារៈយោធាកាន់តែឆាប់រហ័ស ព្រមទាំងផ្តល់នូវច្រកផ្លូវថ្មីមួយបន្ថែមទៀត ក្រៅពីកិច្ចព្រមព្រៀងទ្វេភាគីដែលមានស្រាប់។
– លោកស្រី Jacqueline Borsboom នាយិកាផ្នែកគាំទ្រប្រតិបត្តិការរបស់ទីភ្នាក់ងារ NSPA ប្រាប់កាសែត FT ថា៖ «វាផ្តល់ឱ្យអ៊ុយក្រែននូវលទ្ធភាពក្នុងការមានក្របខ័ណ្ឌដែលមានរចនាសម្ព័ន្ធច្បាស់លាស់ជាងមុន ដើម្បីប្រើប្រាស់សមត្ថភាពចម្រុះយើងផ្តល់ជូន រួមមាន ជំនាញលទ្ធកម្ម សេវាកម្មគាំទ្រ និងលទ្ធភាពទទួលបានមូលដ្ឋានឧស្សាហកម្មដែលមានស្រាប់។ ទីក្រុងកៀវ អាចបញ្ជាទិញសម្ភារផ្គត់ផ្គង់នានា ដូចជាឯកសណ្ឋានជាដើម ហើយទីភ្នាក់ងារនេះអាចជួយសម្រួលឱ្យពួកគេទទួលបានសម្ភារទាំងនោះ»។
– ប្រភពព័ត៌មានបន្ត ការសម្រេចចិត្តចុងក្រោយនេះ គឺនឹងបន្ត បន្ទាប់ពីការសម្រេចចិត្តរបស់ NSPA កាលពីខែមេសា អនុញ្ញាតឱ្យក្រុមហ៊ុនផលិតអាវុធរបស់អ៊ុយក្រែនអាចចូលរួមដេញថ្លៃបាន។
– លោកស្រី Alyona Getmanchuk ប្រធានបេសកកម្មអ៊ុយក្រែនប្រចាំអង្គការណាតូ (NATO) បានប្រាប់កាសែត FT លោកស្រីសង្ឃឹមថា កិច្ចព្រមព្រៀងនេះនឹងផ្តល់ឱ្យអ៊ុយក្រែននូវលទ្ធភាពកាន់តែទូលំទូលាយក្នុងការចូលទៅប្រើប្រាស់បណ្តាញផ្គត់ផ្គង់របស់សម្ព័ន្ធភាពនេះ និងជាច្រកទ្វារដ៏សំខាន់មួយ ចូលទៅក្នុងប្រព័ន្ធអេកូឡូស៊ីឧស្សាហកម្មការពារជាតិរបស់អង្គការណាតូ។
– យ៉ាងណាមិញ ទីក្រុងកៀវបានស្នើសុំប្រព័ន្ធការពារដែនអាកាសបន្ថែមជាយូរមកហើយ ខណៈរុស្ស៊ី កំពុងបង្កើនការវាយប្រហារនៅទូទាំងប្រទេសអ៊ុយក្រែន សម្រាប់យុទ្ធនាការក្នុងរដូវរងានេះ។ ទីក្រុងមូស្គូមានគោលបំណងបំផ្លាញបណ្តាញហេដ្ឋារចនាសម្ព័ន្ធ សេវាសាធារណៈរបស់អ៊ុយក្រែនរហូតដល់ ៩០%។
– ក្នុងចំណោមសំណើទាំងនោះ សំណើសំខាន់ជាងគេ គឺប្រព័ន្ធការពារដែនអាកាស Patriot ផលិតនៅសហរដ្ឋអាមេរិក ព្រមទាំងមីស៊ីលប្រភេទ PAC-3 អាចបាញ់ទម្លាក់មីស៊ីលផ្លោងរបស់រុស្ស៊ីបាន។ ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី ថ្លែងកាលពីថ្ងៃអង្គារ ថា ស្តុកមីស៊ីលប្រភេទនេះនៅអ៊ុយក្រែន គឺប្រើអស់ហើយ។
– ភាពជាដៃគូជាមួយ NSPA នេះ ក៏កើតឡើង ស្របពេល មានភាពរកាំរកូសថ្មីមួយទៀតរវាងទីក្រុងកៀវ និងរដ្ឋបាលអាមេរិក។ ស្ថានភាពនេះកំពុងធ្វើឱ្យកម្មវិធីមួយដែលមានឈ្មោះថា «បញ្ជីតម្រូវការអាទិភាពសម្រាប់អ៊ុយក្រែន» របស់អង្គការណាតូ ធ្លាក់ចូលក្នុងហានិភ័យ។ តាមរយៈកម្មវិធីនេះ សមាជិកណាតូបានផ្តល់ហិរញ្ញប្បទាន សម្រាប់ការទិញអាវុធរបស់សហរដ្ឋអាមេរិក ដើម្បីយកទៅផ្គត់ផ្គង់ដល់ប្រទេសអ៊ុយក្រែន៕

