អន្តរជាតិះ – ភាពតានតឹងនៅសមុទ្រចិនខាងត្បូង នៅតែបន្តកើតមានកាន់តែខ្លាំង ដោយកងទ័ពចិនបានថ្លែងកាលពីថ្ងៃអង្គារ ទី២០ ខែតុលា ថា ខ្លួនបានបញ្ជូនកម្លាំងទៅតាមដាននាវាចម្បាំងអាមេរិកមួយគ្រឿង ដែលចូលក្នុងដែនទឹកជុំវិញថ្មប៉ប្រះទឹកមួយកន្លែងដែលមានជម្លោះ នៅតំបន់សមុទ្រចិនខាងត្បូងដោយខុសច្បាប់។ ទន្ទឹមនឹងនេះ នៅតំបន់ភាគខាងជើងនៃដែនទឹកដដែលនេះ តៃវ៉ាន់បានរាយការណ៍អំពីការប្រឈមមុខដាក់គ្នាជាមួយនាវាចិនមួយគ្រឿង នេះបើយោងតាមទីភ្នាក់ងារសារព័ត៌មាន Reuters។
សូមចុច Subscribe Channel Telegram (KTN)ដើម្បីទទួលបានព័ត៌មានថ្មីៗទាន់ចិត្ត
https://t.me/topnewsktn

នាវាចម្បាំង USS Charleston របស់អាមេរិក។
– ប្រទេសចិន ចាត់ទុកផ្នែកភាគច្រើននៃសមុទ្រចិនខាងត្បូងថា ជាទឹកដីរបស់ខ្លួន ទោះបីជាមានការទាមទារត្រួតគ្នាពីសំណាក់ប្រទេសប្រ៊ុយណេ ម៉ាឡេស៊ី ហ្វីលីពីន តៃវ៉ាន់ និងវៀតណាមក៏ដោយ។ ភាពតានតឹងនាពេលថ្មីៗនេះ គឺឃើញមានភាពស្រួចស្រាល់បំផុតរវាងទីក្រុងប៉េកាំង និងទីក្រុងម៉ានីល។
– បញ្ជាការដ្ឋានភូមិភាគខាងត្បូងរបស់កងទ័ពចិន បានឱ្យដឹងថា នាវា USS Charleston របស់អាមេរិក បានចូលឈ្លានពានដោយខុសច្បាប់ ទៅក្នុងដែនទឹកក្បែរថ្មប៉ប្រះទឹក Sabina ក្នុងប្រជុំកោះ Spratly ដោយគ្មានការអនុញ្ញាតពីរដ្ឋាភិបាលចិន កាលពីព្រឹកថ្ងៃអង្គារ។
– សេចក្តីថ្លែងការណ៍មួយលើកឡើងថា៖ «សកម្មភាពរបស់សហរដ្ឋអាមេរិកនេះ បានរំលោភលើសិទ្ធិអធិបតេយ្យភាព និងផលប្រយោជន៍របស់ប្រទេសចិន ធ្វើឱ្យប៉ះពាល់ដល់សន្តិសុខដែនសមុទ្រ ព្រមទាំងបង្កគ្រោះថ្នាក់ដល់សន្តិភាព និងស្ថិរភាពក្នុងតំបន់។ ភាគីសហរដ្ឋអាមេរិក គួរតែបញ្ឈប់សកម្មភាពបែបនេះជាបន្ទាន់។ កងទ័ពជើងទឹកចិនបានបញ្ជូនកម្លាំងទៅតាមដាន និងឃ្លាំមើលនាវានោះរួចហើយ»។
– អ្នកនាំពាក្យកងនាវាទី៧ នៃកងទ័ពជើងទឹកសហរដ្ឋអាមេរិក ថ្លែងថា នាវា USS Charleston បានធ្វើប្រតិបត្តិការជាប្រចាំ ក្នុងដែនទឹកអន្តរជាតិ ស្របទៅនឹងច្បាប់អន្តរជាតិ។

នាវាចិន។ រូបភាព៖ Reuters
– អ្នកនាំពាក្យម្នាក់ថ្លែងក្នុងសេចក្តីថ្លែងការណ៍មួយថា៖ «គ្រប់ប្រជាជាតិទាំងអស់ សុទ្ធតែមានសិទ្ធិសេរីភាពក្នុងការធ្វើនាវាចរណ៍ និងការប្រើប្រាស់ផ្លូវសមុទ្រស្របច្បាប់ផ្សេងទៀតក្នុងតំបន់នេះ។ អាមេរិកនឹងបន្តធ្វើប្រតិបត្តិការ ទាំងការហោះហើរ និងការធ្វើនាវាចរណ៍ នៅគ្រប់ទីកន្លែងច្បាប់អន្តរជាតិអនុញ្ញាត ដើម្បីគាំទ្រដល់សន្តិភាព ស្ថិរភាព និងសន្តិសុខក្នុងតំបន់»។
– មិនខុសគ្នាប៉ុន្មាន អ្នកនាំពាក្យយោធារបស់ប្រទេសហ្វីលីពីននិយាយថា៖ «នាវារបស់សហរដ្ឋអាមេរិក មិនបានរំលោភចូលទៅក្នុងទឹកដីរបស់ចិនឡើយ។ គ្មានប្រទេសណាមួយមានសិទ្ធិទាមទារឱ្យមានការអនុញ្ញាតជាមុន សម្រាប់ធ្វើដំណើរឆ្លងកាត់ដោយស្របច្បាប់ក្នុងដែនទឹកអន្តរជាតិនោះទេ»៕
