ភ្នំពេញះ – រដ្ឋមន្ត្រីក្រសួងធម្មការលោក ចាយ បូរិន បានផ្ដាំផ្ញើដល់ព្រះមន្ត្រីសង្ឃ មន្ទីរធម្មការនិងសាសនារាជធានីខេត្ត ត្រូវសហការជាមួយអាជ្ញាធរឱ្យបានត្រឹមត្រូវតាមព្រះធម៌វិន័យ និងប្រពៃណី ក្នុងថ្ងៃបវារណាចេញព្រះវស្សារបស់ព្រះសង្ឃ និងរដូវកឋិនទានខាងមុខ។ លោករដ្ឋមន្ត្រី បានបញ្ជាក់សូមឱ្យការរៀបចំស្ថិតក្នុងភាពសាមញ្ញ សន្សំសំចៃ និងមិនបង្កជាបន្ទុកដល់ពុទ្ធបរិស័ទ។
សូមចុច Subscribe Channel Telegram (KTN)ដើម្បីទទួលបានព័ត៌មានថ្មីៗទាន់ចិត្ត
https://t.me/topnewsktn

– លើកឡើងក្នុងពិធីសំណេះសំណាលជាមួយព្រះមន្ត្រីសង្ឃ និងព្រះចៅអធិការគ្រប់វត្តទូទាំងខេត្តកំពង់ឆ្នាំង នៅថ្ងៃទី១៩ ខែតុលា ឆ្នាំ២០២៦ នៅវត្តចន្ទប្បជោត្តនារាម លោក ចាយ បូរិន មានប្រសាសន៍ជំរុញដល់ការរៀបចំថ្ងៃចេញវស្សារបស់ព្រះសង្ឃ និងការរៀបចំកឋិនខាងមុខតាមព្រះធម៌វិន័យ និងប្រពៃណី ក្នុងស្មារតី ព្រះពុទ្ធសាសនាតែមួយ សាសនពិធីតែមួយ ដោយរក្សាភាពសាមញ្ញ សន្សំសំចៃ មិនបង្កជាបន្ទុកដល់ពុទ្ធបរិស័ទ។ បន្ថែមលើនេះលោកបានស្នើដល់អាជ្ញាធរពាក់ព័ន្ធសូមជួយសម្របសម្រួលដល់ពុទ្ធបរិស័ទបានមកធ្វើបុណ្យដោយសុខសុវត្ថិភាព និងត្រូវឆក់យកឱកាសនេះទេសនាអប់រំណែនាំដល់ពុទ្ធបរិស័ទ ឱ្យប្រកាន់ខ្ជាប់នូវសីលធម៌ គុណធម៌ សុជីវធម៌ ដើម្បីកសាងភាពជាពុទ្ធបរិស័ទល្អសម្រាប់ព្រះពុទ្ធសាសនាផង និងរក្សាភាពជាពលរដ្ឋល្អនៅក្នុងសង្គមផង។

– ក្នុងឱកាសនោះលោករដ្ឋមន្ត្រីក៏បានរំលឹកពីការរួមចំណែករបស់ព្រះពុទ្ធសាសនាដល់ការអភិវឌ្ឍហេដ្ឋារចនាសម្ព័ន្ធសង្គមដូចជាស្ពាន ថ្នល់ សាលារៀន មន្ទីរពេទ្យ និងការងារមនុស្សធម៌សង្គមផងដែរ។
– គួរឱ្យដឹងផងដែរ ពិធីបុណ្យកឋិនគឺជាពិធីបុណ្យប្រពៃណីព្រះពុទ្ធសាសនាដ៏ធំមួយ បន្ទាប់ពីថ្ងៃចេញព្រះវស្សា ចាប់ពីថ្ងៃ ១រោច ខែអស្សុជ ដល់ថ្ងៃ ១៥កើត ខែកត្តិក ដែលមានរយៈ២៩ថ្ងៃ។ ពិធីបុណ្យកឋិនឆ្នាំ២០២៦នឹងចាប់ផ្ដើមពីថ្ងៃទី២៧ ខែតុលាខាងមុខនេះហើយ៕
