អន្តរជាតិះ – ប្រទេសចិនបានបញ្ជាក់ជាថ្មីការប្រឆាំងរបស់ខ្លួន ចំពោះការលក់អាវុធទៅឱ្យកោះតៃវ៉ាន់ បន្ទាប់ពីទីក្រុងតៃប៉ិបានទទួលយន្តហោះចម្បាំង F-16V Block 70 ចំនួន ២គ្រឿងដំបូង ក្នុងចំណោមយន្តហោះសរុប ៦៦គ្រឿងពីសហរដ្ឋអាមេរិក។ នេះបើយោងតាមទីភ្នាក់ងារសារព័ត៌មាន Anadolu ផ្សាយនៅថ្ងៃទី៧ ខែតុលា ឆ្នាំ២០២៦ ។
– អ្នកនាំពាក្យក្រសួងការបរទេសចិន លោក Guo Jiakun បានថ្លែងក្នុងសេចក្តីថ្លែងការណ៍ជាលាយលក្ខណ៍អក្សរមួយកាលពីយប់ថ្ងៃអង្គារ ថា៖ «ជំហររបស់ចិនគឺច្បាស់លាស់។ យើងនៅតែប្រឆាំងយ៉ាងដាច់អហង្ការ ចំពោះការលក់អាវុធរបស់សហរដ្ឋអាមេរិកទៅឱ្យតំបន់តៃវ៉ាន់របស់ចិន»។
សូមចុច Subscribe Channel Telegram (KTN)ដើម្បីទទួលបានព័ត៌មានថ្មីៗទាន់ចិត្ត
https://t.me/topnewsktn
– យន្តហោះទាំង ២គ្រឿងនោះបានមកដល់មូលដ្ឋានទ័ពអាកាស Chihhang ភាគខាងកើតតំបន់ Taitung កាលពីថ្ងៃសុក្រ ទី២ ខែតុលា បន្ទាប់ពីបានហោះចេញពីកោះហាវ៉ៃ និងបានឈប់សម្រាកនៅកោះ Guam ។
– ការលក់យន្តហោះ F-16V ចំនួន ៦៦គ្រឿង និងឧបករណ៍ពាក់ព័ន្ធនានា ត្រូវបានអនុម័តដោយសហរដ្ឋអាមេរិកកាលពីឆ្នាំ២០១៩ ក្នុងតម្លៃប្រហែល ៨ប៊ីលានដុល្លារ។
– លោក Guo បន្ថែមថា៖ «បញ្ហាតៃវ៉ាន់គឺជាកិច្ចការផ្ទៃក្នុងរបស់ចិន។ ការដោះស្រាយបញ្ហាកោះតៃវ៉ាន់ គឺជាកិច្ចការផ្ទៃក្នុងរបស់ចិន ដែលមិនអនុញ្ញាតឱ្យមានការជ្រៀតជ្រែកពីខាងក្រៅឡើយ។ ភាគីអាមេរិកចាំបាច់ត្រូវអនុវត្តតាមការឯកភាពគ្នាសំខាន់ៗដែលសម្រេចបាន ក្នុងជំនួបកម្រិតកំពូលរវាងប្រធានាធិបតីទាំងពីរ គោរពតាមគោលការណ៍ «ចិនតែមួយ» និងសេចក្តីថ្លែងការណ៍រួមទាំងបីរវាងចិន និងអាមេរិក ព្រមទាំងប្រព្រឹត្តដោយប្រុងប្រយ័ត្ន ចំពោះបញ្ហាកោះតៃវ៉ាន់»។
– លោក Guo បានលើកឡើងបែបនេះ ពេលត្រូវបានសួរអំពីការយល់ឃើញរបស់មន្ត្រីអាមេរិកលើកឡើងថា លទ្ធភាពដែលចិននឹងឈ្លានពានតៃវ៉ាន់មុនឆ្នាំ២០២៨៕
