អន្តរជាតិះ – លោក ឧត្តមសេនីយ៍ត្រី Hossein Mohebbi អ្នកនាំពាក្យនៃកងឆ្មាំបដិវត្តន៍ឥស្លាមអ៉ីរ៉ង់ (IRGC) បានថ្លែងថា ភាគីបដិបក្ខបានគណនាខុសលើសមត្ថភាពទប់ទល់របស់យោធាអ៉ីរ៉ង់ ព្រមទាំងសមត្ថភាពមីស៊ីល និងដ្រូនរបស់ខ្លួន នៅក្នុងអំឡុងពេលនៃការប៉ះទង្គិចគ្នានាពេលថ្មីៗនេះ រវាងអ៉ីរ៉ង់ និងសហរដ្ឋអាមេរិក។
– លោក Mohebbi បានគូសបញ្ជាក់ថា ចម្ងាយបាញ់ប្រហារ កម្លាំងបំផ្លិចបំផ្លាញ ការកំណត់គោលដៅជាក់លាក់ និងសមត្ថភាពនៃគ្រឿងបរិក្ខារយោធាដែលអ៉ីរ៉ង់បានយកមកប្រើប្រាស់ បានធ្វើឱ្យភាគីម្ខាងទៀតមានការភ្ញាក់ផ្អើលយ៉ាងខ្លាំង។ លោក បានបន្ថែមថា អ៉ីរ៉ង់បានជោគជ័យក្នុងការវាយប្រហារលើគ្រឿងបរិក្ខារយោធា និងបច្ចេកវិទ្យាទំនើបៗមួយចំនួនរបស់សហរដ្ឋអាមេរិក ទាំងនៅលើអាកាស និងលើផ្ទៃសមុទ្រ ក្នុងអំឡុងពេលនៃការប្រយុទ្ធគ្នានោះ។
– អ្នកនាំពាក្យ IRGC រូបនេះក៏បានថ្លែងទៀតថា ទោះបីជាសហរដ្ឋអាមេរិកមានសមត្ថភាពជើងទឹកដ៏ទូលំទូលាយ យ៉ាងណាក៏ដោយ ក៏អាមេរិកបានបរាជ័យក្នុងការស្តារស្ថានការណ៍នៅច្រកសមុទ្រ Hormuz ឱ្យត្រឡប់ទៅរកលក្ខខណ្ឌដែលអាមេរិកចង់បាននោះដែរ។ អ្នកនាំពាក្យរូបនេះ បានអះអាងថា នាវាចម្បាំងរបស់សហរដ្ឋអាមេរិកបានដកថយក្នុងចម្ងាយប្រមាណ ៤០០ គីឡូម៉ែត្រចេញពីច្រកសមុទ្រ Hormuz ខណៈដែលកងនាវាអាមេរិកនៅតែបន្តបោះទីតាំងនៅក្នុងប្រទេសបារ៉ែន។
– លោក Mohebbi បានពិពណ៌នាអំពីស្ថានការណ៍នេះថាជា «ជ័យជម្នះដ៏ធំធេងសម្រាប់អ៉ីរ៉ង់»។
– ពាក់ព័ន្ធនឹងលទ្ធភាពនៃការកើតមានជម្លោះសារជាថ្មី លោកបានបញ្ជាក់ថា អ៉ីរ៉ង់នឹងផ្លាស់ប្តូរវិធីសាស្ត្រការពារខ្លួន និងការសងសឹក ក្នុងករណីមានការវាយប្រហារមួយផ្សេងទៀត។ យោងតាមលោក Mohebbi ការផ្លាស់ប្តូរទាំងនេះអាចរាប់បញ្ចូលទាំងការផ្លាស់ប្តូរទីតាំងភូមិសាស្ត្រនៃជម្លោះ ការប្រើប្រាស់គ្រឿងបរិក្ខារ និងអាវុធថ្មីៗ ព្រមទាំងការជ្រើសរើសគោលដៅវាយប្រហារផ្សេងៗពីមុន។
– អ្នកនាំពាក្យរូបនេះបានបន្ថែមទៀតថា អ៉ីរ៉ង់នៅតែមានសមត្ថភាព និងគោលដៅយុទ្ធសាស្ត្រជាក់លាក់មួយចំនួនដែលមិនទាន់បានយកមកប្រើប្រាស់នៅឡើយ ហើយប្រសិនបើចាំបាច់ ប្រទេសអ៉ីរ៉ង់នឹងទាញយកសមត្ថភាពទាំងនេះមកប្រើប្រាស់ជាមិនខាន៕
