អន្តរជាតិះ – ដំណើរទស្សនកិច្ចរបស់ប្រធានាធិបតីចិន លោក ស៊ី ជិនពីង (Xi Jinping) រយៈពេល៣ថ្ងៃ ចាប់ផ្តើមពីថ្ងពុធដល់ថ្ងៃសុក្រ ទៅកាន់សហរដ្ឋអាមេរិក ដើម្បីជួបពិភាក្សាទ្វេភាគីផង និង បញ្ហាសកលផង ជាមួយប្រធានាធិបតីសហរដ្ឋអាមេរិក លោក ដូណាល់ ត្រាំ បានក្លាយជាមូលបទដ៏ចាប់អារម្មណ៍ខ្លាំងជាងកិច្ចប្រជុំមហាសន្និបាតអង្គការសហប្រជាជាតិ (UNGA) ដែល មេដឹកនាំ និង តំណាងនៃបណ្តាប្រទេសនានាកំពុងថ្លែងសារនយោបាយដើម្បីឲ្យអន្តរជាតិបានដឹងពីជំហររបស់ប្រទេសនិមួយៗទៅលើបញ្ហាសកលនាពេលបច្ចុប្បន្ន។
សូមចុច Subscribe Channel Telegram (KTN)ដើម្បីទទួលបានព័ត៌មានថ្មីៗទាន់ចិត្ត
https://t.me/topnewsktn
– ប្រធានាធិបតីចិន លោក ស៊ី ជីនពីង បានធ្វើដំណើរតាមយន្តហោះ Air China របស់ប្រធានាធិបតី ដោយចុះចតនៅអាកាសយានដ្ឋានកងទ័ពអាកាស Joint Base Andrews របស់សហរដ្ឋអាមេរិកសម្រាប់ទស្សនកិច្ចផ្លូវរដ្ឋទ្វេភាគីដ៏កំពូល ហើយប្រធានាធិបតីអាមេរិក លោក ដូណាល់ ត្រាំ បានឈរត្រៀមខ្លួនទទួល លោក ស៊ី ជិតដល់ជណ្តើរយន្តហោះ ដោយក្រាលកម្រាលព្រំពណ៌ក្រហមចាំទទួល។
– ទាំងបណ្តាញសារព័ត៌មានរបស់សហរដ្ឋអាមេរិក និង សារព័ត៌មានរបស់ចិន សំខាន់ៗ ក៏ដូចជា បណ្តាញសារព័ត៌មាននៃបណ្តាប្រទេសដទៃនៅជុំវិញពិភពលោក បានបង្វែរការផ្តោតរបស់ពួកគេមកកាន់ជំនួបមេដឹកនាំចិន និងសហរដ្ឋអាមេរិកនេះយ៉ាងខ្លាំង ដោយទម្លាក់ចោលឬថាផ្តល់តម្លៃខ្លាំងលើព្រឹត្តិការណ៍នានាដែលកំពុងប្រព្រឹត្តទៅនៅឯកិច្ចប្រជុំកំពូលមហាសន្និបាទនៃអង្គការសហប្រជាជាតិ (UNGA) ដែលនឹងត្រូវចាយពេលរហូតដល់ថ្ងៃសុក្រនោះដែរ។
– សារព័ត៌មានអាមេរិក CBS News បានអត្ថាធិប្បាយថា ដំណើរទស្សនកិច្ចរបស់លោក ស៊ី ទៅកាន់សេតវិមានលើកនេះ គឺជាលើកទី១ក្នុងរយៈពេលជាង១ទសវត្សរ៍ ដោយបង្ហាញឲ្យឃើញពីការទទួលផ្លូវរដ្ឋ ដែលមានប្រធានាធិបតី ត្រាំ អមជាមួយកងកម្លាំងយោធាអាមេរិកត្រៀមហែរហម។
– សេចក្តីអត្ថាធិប្បាយនោះ ក៏បានបង្ហាញថា សហរដ្ឋអាមេរិកនិងចិននឹងប្តេជ្ញាថាតើកិច្ចព្រមព្រៀងដ៏ផុយស្រួយរបស់ពួកគេលើពន្ធគយ នឹងបន្ត ខណៈពេលដែលក្តីកង្វល់កើនឡើងដូចភ្នំ អំពីទំនាក់ទំនងចិនជាមួយអ៊ីរ៉ង់ និង រុស្ស៊ី។
– សារព័ត៌មានចិន ស៊ីហ៊ួរ (Xinhua) បានផ្តោតលើសាររបស់ប្រធានាធិបតីចិន ដែលបានសរសេរនៅពេលទៅដល់សហរដ្ឋអាមេរិក ដោយលោក ស៊ី បង្ហាញទំនុកចិត្តដេលចិននិងសហរដ្ឋអាមេរិកអាចស្វែងរកឃើញនូវផ្លូវត្រឹមត្រូវស្របគ្នាក្នុងយុគសម័យថ្មី។ តាមសំណេរនោះ លោក ស៊ី បានកត់សម្គាល់ថា ប្រធានាធិបតី ដូណាល់ ត្រាំ យល់ស្របដើម្បីកសាងទំនាក់ទំនងចិននិងអាមេរិក ប្រកបដោយការស្ថាបនាគ្នាលើស្ថិរភាពយុទ្ធសាស្រ្ត អំឡុងពេលដំណើរទស្សនកិច្ចរបស់លោក ត្រាំ ទៅកាន់ប្រទេសចិនកាលពីខែឧសភាកន្លងទៅ ដែលបានផ្តល់នូវមាគ៌ាយុទ្ធសាស្រ្តសម្រាប់ការអភិវឌ្ឍទំនាក់ទំនងទ្វេភាគីក្នុងពេលអនាគត។
– មកដល់របត់មួយដែល សហរដ្ឋអាមេរិកត្រូវបានពិភពលោក មើលឃើញថា ជាអ្នកបង្ករឿង បង្កើតសង្គ្រាមនៅមជ្ឈិមបូព៌ា ដោយសារតែការចូលរួមជាមួយអ៊ីស្រាអែលក្នុងការបើកការវាយប្រហារអ៊ីរ៉ង់កាលពីចុងខែកុម្ភៈកន្លងទៅ គឺត្រឹមត្រែរយៈពេលជាង១ខែប៉ុណ្ណោះ បន្ទាប់ពីលើកទ័ពចូលទៅចាប់ខ្លួនប្រធានាធិបតីវេណេស៊ុយអេឡា បានធ្វើឲ្យតួនាទីរបស់ចិនកាន់តែធំ និង មានតម្លៃក្នុងនយោបាយអន្តរជាតិ និង ភូមិសាស្រ្តនយោបាយ។
– ក្នុងជំនួបរវាងប្រធានាធិបតិ ចិន និងអាមេរិកលើកនេះ មិនត្រឹមតែដោះស្រាយជម្លោះពាណិជ្ជកម្មទ្វេភាគីរវាងប្រទេសរបស់ពួកគេទាំងពីរផ្ទាល់នោះទេ ប៉ុន្តែបញ្ហានានាក្នុងពិភពលោក ជាពិសេស ជម្លោះនៅមជ្ឈិមបូព៌ា និង បញ្ហាជម្លោះនៅអ៊ុយក្រែន ក៏ទំនងក្លាយជាប្រធានបទសំខាន់ដែលកំពូលមេដឹកនាំទាំងពីរត្រូវដោះស្រាយនៅក្នុងជំនួបនេះ៕
