ភ្នំពេញះ – គិតត្រឹមខែសីហា ឆ្នាំ២០២៦ កម្ពុជាមានយានយន្តអគ្គិសនីចុះបញ្ជីសរុបមានចំនួន ២២ ៧៩៣ គ្រឿង ក្នុងនោះរថយន្តអគ្គិសនីមានចំនួន ១៦ ៩២៦ គ្រឿង ទោចក្រយានយន្តចំនួន ៤ ៩៧៤ គ្រឿង និងត្រីចក្រយានយន្តមានចំនួន ៨៩៣ គ្រឿង។
– លោក ផន រឹម មន្ត្រីអ្នកនាំពាក្យក្រសួងសាធារណការ និងដឹកជញ្ជូន បានបញ្ជាក់ថា ប្រជាពលរដ្ឋកំពុងមានការចាប់អារម្មណ៍ និងសុទិដ្ឋិនិយមកាន់តែច្រើនចំពោះការប្រើប្រាស់យានយន្តអគ្គិសនី ដែលកំពុងក្លាយជានិន្នាការថ្មីក្នុងវិស័យដឹកជញ្ជូននៅកម្ពុជា។
– យានយន្តអគ្គិសនីត្រូវបានមើលឃើញថា អាចជួយកាត់បន្ថយការចំណាយប្រចាំថ្ងៃ មានភាពងាយស្រួលក្នុងការប្រើប្រាស់ និងកាត់បន្ថយការបញ្ចេញសារធាតុបំពុលទៅក្នុងបរិយាកាស ខណៈក្រុមហ៊ុនផលិតយានយន្តអគ្គិសនីមួយចំនួនអះអាងថា យានយន្តប្រភេទនេះអាចមានការបញ្ចេញឧស្ម័នពុលនៅកម្រិតសូន្យនៅពេលដំណើរការ។
– ជាមួយនឹងកំណើននៃការប្រើប្រាស់យានយន្តអគ្គិសនី ហេដ្ឋារចនាសម្ព័ន្ធស្ថានីយសាកថាមពលក៏ត្រូវបានពង្រីកជាបន្តបន្ទាប់។
– បើតាមប្រភពអាជ្ញាធរអគ្គិសនីកម្ពុជា បច្ចុប្បន្នស្ថានីយសាកយានយន្តអគ្គិសនីបានកើនឡើងដល់ជាង ៤០០ ទីតាំង ទូទាំងប្រទេស។
– ការពង្រីកស្ថានីយសាក EV ទាំងនេះ ត្រូវបានចាត់ទុកថាជាផ្នែកមួយនៃការរៀបចំហេដ្ឋារចនាសម្ព័ន្ធគាំទ្រដល់ការផ្លាស់ប្តូរទៅប្រើប្រាស់យានយន្តស្អាត និងថាមពលបៃតងនៅកម្ពុជា។

– អាជ្ញាធរអគ្គិសនីកម្ពុជាបានឱ្យដឹងថា ការរៀបចំស្ថានីយសាកយានយន្តអគ្គិសនីត្រូវមានការគ្រប់គ្រងប្រព័ន្ធអគ្គិសនីឱ្យបានច្បាស់លាស់ ដោយសារស្ថានីយមួយចំនួនត្រូវការប្រើប្រាស់អានុភាពអគ្គិសនីខ្ពស់ ដែលអាចប្រហាក់ប្រហែលនឹងតម្រូវការរបស់រោងចក្រ ឬសហគ្រាសឧស្សាហកម្មខ្នាតធំ។
– ចំពោះទីតាំងសាធារណៈដែលបម្រើប្រយោជន៍រួម ដូចជា សួនច្បារ កន្លែងហាត់ប្រាណ ឬបរិវេណស្ថាប័នរដ្ឋ អគ្គិសនីកម្ពុជាតែងទទួលសំណូមពរពីរាជធានី-ខេត្ត ដើម្បីចូលរួមវិនិយោគរៀបចំហេដ្ឋារចនាសម្ព័ន្ធសាក EV សម្រាប់ប្រជាពលរដ្ឋប្រើប្រាស់។
– សម្រាប់ទីតាំងអាជីវកម្មរបស់បុគ្គល ឬក្រុមហ៊ុនឯកជន ដែលមានការប្រើប្រាស់អគ្គិសនីច្រើន និងមានលក្ខណៈអចិន្ត្រៃយ៍ អគ្គិសនីកម្ពុជាអាចគាំទ្រការរៀបចំបណ្តាញអគ្គិសនី និងត្រង់ស្វូរ ដោយកន្លងមកមានការវិនិយោគទឹកប្រាក់រាប់ម៉ឺនដល់រាប់សែនដុល្លារនៅតាមទីតាំងមួយចំនួន។
– រាជរដ្ឋាភិបាលបានប្រគល់ភារកិច្ចដល់ក្រសួងរ៉ែ និងថាមពល ក្នុងការរៀបចំ គ្រប់គ្រង និងពង្រីកការដំឡើងស្ថានីយសាកថ្ម ឬសាកថាមពលយានយន្តអគ្គិសនីឱ្យបានទូលំទូលាយទូទាំងប្រទេស។
– ការពង្រីកស្ថានីយសាក EV ក៏ត្រូវធានាឱ្យបាននូវស្តង់ដារគុណភាព និងសុវត្ថិភាព ដើម្បីធានាដល់ការប្រើប្រាស់ប្រកបដោយទំនុកចិត្តរបស់ប្រជាពលរដ្ឋ។
– រាជរដ្ឋាភិបាលកម្ពុជាកំពុងជំរុញការប្រើប្រាស់យានយន្តអគ្គិសនី ដើម្បីចូលរួមកាត់បន្ថយការបញ្ចេញឧស្ម័នផ្ទះកញ្ចក់ និងគាំទ្រគោលដៅអព្យាក្រឹតកាបូននៅឆ្នាំ ២០៥០។
– តាមផែនការរបស់រដ្ឋាភិបាល កម្ពុជាមានគោលដៅបង្កើនសមាមាត្រការប្រើប្រាស់រថយន្តអគ្គិសនីឱ្យបានប្រមាណ ៣៥%–៤០% និងម៉ូតូអគ្គិសនីឱ្យបានដល់ ៧០% នៅឆ្នាំ២០៥០៕
