អន្តរជាតិះ – តម្លៃប្រេងឆៅអន្តរជាតិបានហក់ឡើងជាង ៧% ក្នុងសប្ដាហ៍នេះ ដល់ជាង ៩០ ដុល្លារ/បារ៉ែល ខណៈជម្លោះយោធារវាងសហរដ្ឋអាមេរិក និងអ៊ីរ៉ង់បន្តរំខានច្រកដឹកប្រេងនៅតំបន់មជ្ឈិមបូព៌ា និងបង្កើនកង្វល់អំពីការផ្គត់ផ្គង់ប្រេងពិភពលោក។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។
– តម្លៃប្រេងឆៅ Brent បានបិទការជួញដូរ ៩២,៦៨ ដុល្លារ/បារ៉ែល កើន ៧៦ សេន ឬ ០,៨% កាលពីថ្ងៃសុក្រ។ តម្លៃប្រេង West Texas Intermediate (WTI) វិញ បានបិទការជួញដូរនៅ ៩១,៤៨ ដុល្លារ/បារ៉ែល កើន ១៨ សេន ឬ ០,២%។ សម្រាប់សប្ដាហ៍នេះ តម្លៃប្រេង Brent បានកើន ៧,៦% ខណៈ WTI កើនជិត ១០%។
សូមចុច Subscribe Channel Telegram (KTN)ដើម្បីទទួលបានព័ត៌មានថ្មីៗទាន់ចិត្ត
https://t.me/topnewsktn
– អ្នកវិភាគបានលើកឡើងថា ភាពតានតឹងនៅមជ្ឈិមបូព៌ា និងការរំខានដល់ការដឹកជញ្ជូនតាមផ្លូវសមុទ្រ បានបន្ថែម «ហានិភ័យ» ទៅក្នុងតម្លៃប្រេង។ ការឆ្លងកាត់ច្រកសមុទ្រហ័រមូហ្ស ដែលជាផ្លូវដឹកជញ្ជូនប្រេងសំខាន់ នៅតែមានកម្រិតទាបជាងធម្មតា។
– ស្ថានការណ៍នេះកំពុងបង្កើនសម្ពាធលើអតិផរណា និងថ្លៃដើមខ្ចីប្រាក់របស់រដ្ឋាភិបាលនៅជុំវិញពិភពលោក ហើយបង្កើនការព្រួយបារម្ភថា កំណើនសេដ្ឋកិច្ចពិភពលោកអាចនឹងថយចុះ ប្រសិនបើតម្លៃថាមពលនៅតែខ្ពស់។
– ទោះជាយ៉ាងណា អ្នកជំនាញមួយចំនួនយល់ថា ការឡើងថ្លៃប្រេងនាពេលនេះមួយផ្នែកធំត្រូវបានជំរុញដោយការភ័យខ្លាច និងភាពមិនប្រាកដប្រជា ខណៈមិនទាន់មានភស្តុតាងច្បាស់ថា ការប៉ះទង្គិចថ្មីៗរវាងអាមេរិក និងអ៊ីរ៉ង់ បានធ្វើឱ្យការនាំចេញប្រេងពីមជ្ឈិមបូព៌ាធ្លាក់ចុះខ្លាំង។
– ស្ថាប័នវិភាគទីផ្សារមួយចំនួនបានដំឡើងការព្យាករតម្លៃប្រេងរយៈពេលខ្លី ដោយរំពឹងថា Brent អាចឡើងដល់ប្រមាណ ៩៥ ដុល្លារ/បារ៉ែល ប្រសិនបើជម្លោះនៅមជ្ឈិមបូព៌ាកាន់តែធ្ងន់ធ្ងរ៕
