អន្តរជាតិះ- យោងតាមអ្នកនាំពាក្យរបស់កងឆ្មាំបដិវត្តន៍អ៊ីស្លាម (IRGC អង្គភាពវរជននៃកងទ័ពអ៊ីរ៉ង់) លោក Hossein Mohebi បាននិយាយថា អាជ្ញាធរអ៊ីរ៉ង់ មានផែនការអំពីរបៀបឆ្លើយតបទៅនឹងជំហានអរិភាពនីមួយៗរបស់សហរដ្ឋអាមេរិក និងរបៀបជៀសវាងផលប៉ះពាល់អវិជ្ជមាននៃទណ្ឌកម្មថ្មីរបស់ទីក្រុងវ៉ាស៊ីនតោនផងដែរ។
– លោក បាននិយាយថា បញ្ជារបស់លោកប្រធានាធិបតីអាមេរិក ដូណាល់ ត្រាំ ស្តីពីការចាប់ផ្តើមសង្គ្រាមសេដ្ឋកិច្ចដ៏លំបាកបំផុតប្រឆាំងនឹងអ៊ីរ៉ង់ បានកើតឡើង ក្រោយការទទួលស្គាល់ដោយស្ងៀមស្ងាត់អំពីបរាជ័យរបស់ទីក្រុងវ៉ាស៊ីនតោននៅលើសមរភូមិយោធា។
សូមចុច Subscribe Channel Telegram (KTN)ដើម្បីទទួលបានព័ត៌មានថ្មីៗទាន់ចិត្ត
https://t.me/topnewsktn
– លោក បានបន្ថែមថា សង្គ្រាមសេដ្ឋកិច្ចរបស់ទីក្រុងវ៉ាស៊ីនតោន មិនមែនជារឿងថ្មីសម្រាប់ទីក្រុងតេអេរ៉ង់ទេ ដោយបន្ថែមថា សហរដ្ឋអាមេរិកបានធ្វើសង្គ្រាមបែបនេះអស់រយៈពេល ៤៧ ឆ្នាំមកហើយ ហើយបានដាក់ទណ្ឌកម្មលើសសរស្តម្ភទាំងអស់នៃសេដ្ឋកិច្ចអ៊ីរ៉ង់។
– ទន្ទឹមនោះ លោក ក៏បានសង្កត់ធ្ងន់ថា អ៊ីរ៉ង់ មានផែនការអំពីរបៀបឆ្លើយតបទៅនឹងសកម្មភាពសត្រូវនីមួយៗ។ យើងក៏មានសេណារីយ៉ូមួយអំពីរបៀបជៀសវាងផលប៉ះពាល់អវិជ្ជមាននៃសម្ពាធថ្មី និងបង្កើតទំនាក់ទំនងសេដ្ឋកិច្ចជាមួយប្រទេសផ្សេងៗ ផងដែរ។
– លើសពីនេះ លោក បន្តថា សាធារណរដ្ឋអ៊ីស្លាមគ្មានកង្វល់អ្វីទាំងអស់ក្នុងវិស័យសេដ្ឋកិច្ច។ តាមសម្ដីរបស់លោក អាជ្ញាធរអ៊ីរ៉ង់កំពុងអភិវឌ្ឍទំនាក់ទំនងសេដ្ឋកិច្ចនៅក្រោមច្រមុះសហរដ្ឋអាមេរិក ដោយរំលងពួកគេ ហើយលទ្ធផលនឹងត្រូវបានមើលឃើញនាពេលអនាគតដ៏ខ្លីខាងមុខ។
– គួររំលឹកថា លោក ត្រាំ បានប្រកាសពីការចាប់ផ្តើមសង្គ្រាមសេដ្ឋកិច្ច និងការដាក់ឱ្យសេដ្ឋកិច្ចឯកោក្នុងទ្រង់ទ្រាយធំមិនធ្លាប់មានពីមុនមកប្រឆាំងនឹងអ៊ីរ៉ង់។ មេដឹកនាំអាមេរិក ក៏បានព្រមានផងដែរថា ប្រទេសណាដែលមានស្ថាប័នហិរញ្ញវត្ថុ អាជីវកម្ម ឬភ្នាក់ងាររដ្ឋាភិបាលគាំទ្រទីក្រុងតេអេរ៉ង់ នឹងប្រឈមមុខនឹងផលវិបាកសេដ្ឋកិច្ចធ្ងន់ធ្ងរពីទីក្រុងវ៉ាស៊ីនតោនដូចគ្នា។
– ជុំវិញផែនការនេះ ក្រសួងការបរទេសអ៊ីរ៉ង់ បានរិះគន់ថាជា «ភេរវកម្មសេដ្ឋកិច្ច និងជាឧក្រិដ្ឋកម្មប្រឆាំងនឹងមនុស្សជាតិ»។ ក្រសួងដដែល បន្តថារដ្ឋបាលអាមេរិក អ្នកដែលបង្កើតផែនការដាក់ទណ្ឌកម្ម និងអ្នកដែលកំពុងអនុវត្តផែនការទាំងនោះ ត្រូវតែទទួលទណ្ឌកម្មសមស្រប ត្រឡប់ទៅវិញ៕
