កំពង់ឆ្នាំង៖ ប្រជានេសាទដែលប្រកបរបរអូសលៀស នៅឃុំឆ្នុកទ្រូ ស្រុកបរិបូណ៌ ខេត្តកំពង់ឆ្នាំង បានស្នើឱ្យរាជរដ្ឋាភិបាល និងក្រសួងកសិកម្ម រុក្ខាប្រមាញ់ និងនេសាទ ដាក់បញ្ចូលការនេសាទលៀសដោយប្រើប្រាស់ម៉ាស៊ីន ទៅក្នុងច្បាប់ជលផល។ ការស្នើនេះ បានធ្វើឡើងក្នុងពិធីសំណេះសំណាលជាមួយមន្រ្តីជំនាញកសិកម្ម ដឹកនាំដោយលោក ហាស់ សារ៉េត រដ្ឋលេខាធិការក្រសួងកសិកម្ម នាពេលថ្មីៗនេះ…។
សូមចុច Subscribe Channel Telegram (KTN)ដើម្បីទទួលបានព័ត៌មានថ្មីៗទាន់ចិត្ត
https://t.me/topnewsktn

ក្នុងពិធីនោះ លោក ហាស់ សារ៉េត បានអនុញ្ញាតឱ្យប្រជានេសាទលើកឡើងពីបញ្ហានានា ដែលកំពុងប្រឈមនៅក្នុងការប្រកបរបរនេសាទលៀស ហើយក្រសួងកសិកម្ម ជាសេនាធិការរាជរដ្ឋាភិបាល នឹងចូលរួមជួយដោះស្រាយបញ្ហាប្រឈមទាំងនោះជូនប្រជាជន។ តាមរយៈការពិភាក្សាយ៉ាងផុលផុស រវាងប្រជានេសាទ គណៈអធិបតី និងជំនាញជលផល ប្រជានេសាទបានបង្ហាញការយល់ថា យុទ្ធនាការបង្ក្រាបបទល្មើសនេសាទអូសលៀសដោយប្រើម៉ាស៊ីន ពីសំណាក់កងអន្តរាគមន៍ គឺជាការអនុវត្តត្រឹមត្រូវតាមច្បាប់។ លើសពីនេះ ប្រជាពលរដ្ឋដែលជាប្រជានេសាទបានស្នើសុំរាជរដ្ឋាភិបាល ជាពិសេសក្រសួងកសិកម្ម ដាក់បញ្ចូលការនេសាទលៀសដោយប្រើប្រាស់ម៉ាស៊ីន ទៅក្នុងច្បាប់ជលផល តាមបច្ចេកទេស ដោយមានកំណត់ទីតាំង និងពេលវេលាច្បាស់លាស់។ ទាំងប្រជានេសាទ និងអ្នកប្រមូលទិញលៀស ក៏បានស្រុះស្រួលមតិគ្នា ដោយសន្យាមិនអូស និងមិនប្រមូលទិញលៀសតូចៗនោះទេ។

យ៉ាងណាក លោក ហាស់ សារ៉េត រដ្ឋលេខាធិការក្រសួងកសិកម្ម ក៏បានពន្យល់បន្ថែមទៅកាន់ប្រជានេសាទថា ការរឹតបន្តឹការអនុវត្តច្បាប់របស់កម្លាំងអន្តរាគមន៍ និងមន្ត្រីជំនាញពាក់ព័ន្ធ ធ្វើឡើងក្នុងគោលដៅថែរក្សាធនធានជលផល សម្រាប់កូនចៅជំនាន់ក្រោយ។ ដូច្នេះការងារនេះ មិនអាចសម្រេចបានទេ បើគ្មានការចូលរួមពីប្រជានេសាទ ប្រើប្រាស់ឧបករណ៍នេសាទស្របតាមច្បាប់កំណត់ ដោយធ្វើឡើងចេញពីបេះដូង ដើម្បីរក្សានិរន្ដរភាពធនធាននិងសម្បត្តិធម្មជាតិរបស់កម្ពុជា៕


