អន្តរជាតិះ- បន្ទាប់ពីប្រកាសចាត់វិធានការសេដ្ឋកិច្ចធ្វើឲ្យផ្អើលពិភពលោកមក ពេលនេះប្រធានាធិបតីអាមេរិកលោក ដូណាល់ ត្រាំ បានសម្រេចផ្អាកយកពន្ធលើប្រទេសម៉ិកស៊ិកនិងកាណាដា រយៈពេល៣០ថ្ងៃសិន។
– Joined the group គេហទំពរ័ (KTN) https://t.me/topnewsktn
និងទទួលបានពត៌មានថ្មី ទាន់ហេតុការណ៍ ដ៏ច្រើន ប្រចាំថ្ងៃ ! សូមអរគុណ!
– ការសម្រេចចិត្តរបស់ប្រមុខសេតវិមានរូបនេះ កើតឡើងបន្ទាប់ពីលោកបានពិភាក្សាជាមួយមេដឹកនាំប្រទេសទាំងពីរ ស្តីពីការរឹតបន្តឹងព្រំដែន។ សេចក្តីប្រកាសនេះទៀតសោត កើតឡើងត្រឹម២ថ្ងៃប៉ុណ្ណោះបន្ទាប់ពីលោក ត្រាំ ដាក់ពន្ធ២៥% លើទំនិញពីម៉ិកស៊ិកនិងកាណាដា ដោយលើកឡើងពីក្តីបារម្ភអំពីការធ្វើអន្តោប្រវេសន៍ខុសច្បាប់ និងការជួញដូរគ្រឿងញៀន។
– ក្នុងការបង្ហោះលើបណ្តាញសង្គម Truth Social កាលពីថ្ងៃចន្ទទី៣ខែកុម្ភៈឆ្នាំ២០២៥ លោក ត្រាំ សរសេរថា លោកបានសន្ទនាជាមួយប្រធានាធិបតីម៉ិកស៊ិកអ្នកស្រី Claudia Sheinbaum Pardo ហើយក្នុងអំឡុងពេលនោះ អ្នកស្រីបានយល់ព្រមដាក់ពង្រាយកងទ័ព ១០ ០០០នាក់ទៅព្រំដែនភាគខាងជើង។ កងទ័ពទាំងនោះ នឹងជួយទប់ស្កាត់លំហូរជនអន្តោប្រវេសន៍ខុសច្បាប់និងគ្រឿងញៀន Fentanyl មិនឲ្យចូលមកសហរដ្ឋអាមេរិក។
– និយាយពីកាណាដាវិញ លោកត្រាំ ក៏ផ្អាកយកពន្ធ២៥%រយៈពេល៣០ថ្ងៃសិនដែរ បន្ទាប់ពីសន្ទនាជាមួយលោកនាយករដ្ឋមន្ត្រី Justin Trudeau។
– ជាផ្នែកនៃកិច្ចព្រមព្រៀងរវាងមេដឹកនាំទាំងពីរ, លោក Trudeau បានឯកភាពអនុវត្តវិធានការសន្តិសុខនៅតាមព្រំដែនឲ្យកាន់តែតឹងរ៉ឹងជាងមុន ដើម្បីប្រយុទ្ធប្រឆាំងនឹងការធ្វើអន្តោប្រវេសន៍ខុសច្បាប់ និងការជួញដូរគ្រឿងញៀន។ កិច្ចព្រមព្រៀងនេះក៏រួមបញ្ចូលទាំងការចំណាយប្រាក់ ១.៣ លានដុល្លារនិងបញ្ជូនទាហានបន្ថែមដើម្បីពង្រឹងសន្តិសុខព្រំដែន ដូចដែលលោកត្រាំ ឯកភាពជាមួយប្រធានាធិបតីម៉ិកស៊ិកដែរ។
– ទម្រាំឈានដល់កិច្ចព្រមព្រៀង លោកត្រាំ បានគំរាមរួចទៅហើយឲ្យកាណាដា ចូលរួមជាមួយសហរដ្ឋអាមេរិកមកក្នុងនាមជារដ្ឋទី៥១មក បើពួកគេមិនចង់បង់ពន្ធ។
– នៅដើមឆ្នាំនេះ លោក ត្រាំ បានបង្ហាញគំនិតចង់ដាក់បញ្ចូលប្រទេសកាណាដា ជារដ្ឋទី៥១របស់អាមេរិក ដោយប្រើការបង្ខិតបង្ខំផ្នែកសេដ្ឋកិច្ច ដើម្បីសម្រេចបំណងនេះ។ លោកត្អូញត្អែរជាយូរមកហើយអំពីអតិរេកពាណិជ្ជកម្មរបស់កាណាដាជាមួយសហរដ្ឋអាមេរិក ហើយបានប្រាប់អ្នកកាសែតថា ព្រំដែនគ្រាន់តែជា «បន្ទាត់ដែលគូរដោយសិប្បនិម្មិត» ប៉ុណ្ណោះ៕
